മുരിങ്ങക്ക, മാങ്ങ, ചക്കക്കുരു, ചെറിയ ചെമ്മീൻ തേങ്ങ അരച്ചു വെച്ചത്‌ :

By:

Mabel Vivera

ഉണ്ടാക്കാൻ:

ചെറിയ ചെമ്മീൻ കഴുകി നന്നാക്കിയത്, മുരിങ്ങക്കാ, ചക്കക്കുരു, പച്ചമാങ്ങ (ഇവ മൂന്നും വൃത്തിയാക്കി നുറുക്കി എടുത്തത്‌ )
മുളക് പൊടി, മഞ്ഞൾ പൊടി, ജീരകപൊടി, തേങ്ങാപ്പീര
ഉള്ളി, ഇഞ്ചി, വെളുത്തുള്ളി, പച്ചമുളക്, ഉപ്പു
കടുക് വറുക്കാൻ - ഉള്ളി അരിഞ്ഞതു, വറ്റൽ മുളക്, കറിവേപ്പില, എണ്ണ

കറി വെയ്ക്കുന്ന വിധം:

200 ഗ്രാം ചെറിയ തരം കൊഞ്ചും കാൽ കപ്പു ചക്കക്കുരു വൃത്തിയാക്കിയതും 2 ചുവന്നുള്ളി, 4 -5 വെളുത്തുള്ളി ഒരു ചെറിയ കഷ്ണം ഇഞ്ചി അരിഞ്ഞത് ഇട്ടു മഞ്ഞൾപൊടിയും ഉപ്പും കുറച്ചു വെള്ളവും ചേർത്ത് വേവിച്ചെടുക്കുക.
ഇത് ഒരു മുക്കാൽ വേവ് ആകുമ്പോൾ മുരിങ്ങക്കായ കഷ്ണങ്ങൾ ചേർക്കുക , വേവ് കുറഞ്ഞ ചക്കക്കുരു ആണെങ്കിൽ മുരിങ്ങക്കായ നേരത്തെ ചേർക്കുക, അവസ്സാനമായി അരിഞ്ഞു വെച്ച പച്ച മാങ്ങാകഷ്ണങ്ങളും 2 പച്ചമുളകും ചേർക്കുക.
തേങ്ങ അരയ്ക്കാൻ : അര കപ്പു തേങ്ങാപ്പീര, കാൽ സ്പൂണ്‍ മഞ്ഞൾപൊടി, ഒരു ചെറിയ നുള്ള് ജീരകപൊടി, അര സ്പൂണ്‍ മുളകുപൊടി - ഇവ നല്ലത് പോലെ അരച്ചെടുക്കുക. ( എരിവു ഇഷ്ടമുള്ളവർ മുളകുപൊടി കൂടുതൽ ചേർക്കാം - ഞാൻ ഒരു ചെറിയ സ്പൂണ്‍ കാശ്മീരി മുളക് പൊടി ചേർത്തു).

കഷ്ണങ്ങൾ വെന്തു വരുമ്പോൾ തേങ്ങാ അരച്ചത്‌ ചേർത്ത് ഇളക്കുക. ഉപ്പു പാകത്തിന് ചേർത്ത് കറി തിളയ്ക്കാതെ നേരിയ തീയിൽ ഇളക്കി കൊടുക്കുക. [പച്ചമാങ്ങ കിട്ടിയില്ലെങ്കിൽ വാളൻ പുളി പിഴിഞ്ഞത് നേരിയതായി പുളിക്കു വേണ്ടി ചേർക്കാം].

രണ്ടു മൂന്ന് മിനിട്ടോളം കഴിഞ്ഞു കറി അടുപ്പിൽ ഇറക്കി വെച്ച് കറി താളിച്ചെടുക്കുക (കടുക് പൊട്ടിച്ചു ഉള്ളിയും വറ്റൽ മുളകും കറിവേപ്പിലയും വഴറ്റി ഇടുക)