കൂന്തൽ കിഴി മസാല

കൂന്തൽ കിഴി മസാല
By : Sherin Reji
വാട്ടിയ വാഴയിലയിൽ ആവിയിൽ തയ്യാറാക്കുന്ന നല്ല എരിവുള്ളൊരു കൂന്തൽ മസാല.. 

കൊച്ചുള്ളി - 15
പച്ചമുളക് - 2
വെളുത്തുള്ളി - 15 അല്ലി
ഇഞ്ചി - ചെറിയ കഷ്ണം

എല്ലാം കൂടി നന്നായൊന്നു കല്ലിൽ അരച്ചെടുത്തു... ചീനചട്ടിയിൽ വെളിച്ചെണ്ണ ഒഴിച്ച് കാഞ്ഞപ്പോൾ ഒരു പിടി കറി വേപ്പില ഇട്ടൊന്നു വഴറ്റി അരച്ച മസാല പേസ്റ്റ് ചേർത്ത് പച്ച മണം മാറും വരെ വഴറ്റി...

ഇതിലേക്ക് 2 സ്പൂൺ മുളകുപൊടി, 1 സ്പൂൺ മല്ലിപൊടി, 1/2 സ്പൂൺ ഗരം മസാല പൊടി, 1/2 സ്പൂൺ കുരുമുളകുപൊടി, 1/4 സ്പൂൺ മഞ്ഞൾപൊടി ചേർത്തൊന്നു വഴറ്റി...

1 തക്കാളി ചെറുതായി അരിഞ്ഞതും ചേർത്ത് നന്നായി ഇളക്കി ഉടയും വരേ 2 മിനുട്ട് കുക്ക് ചെയ്തു...ഏകദേശം 500 gm കൂന്തൽ വട്ടത്തിൽ ഞുറുക്കിയതും, ഉപ്പും 1 ചുള കുടംപൊളി പിച്ചി കീറിയതും ചേർത്തു അടച്ചു വച്ച് വേവിച്ചു... 1/2 കപ്പ് തേങ്ങാപാൽ കൂടെ ചേർത്തു ഒന്ന് ചൂടാക്കി..

ഇതിലേക്ക് 1/4 സ്പൂൺ ഗരം മസാലയും പെരും ജീരകം പൊടിച്ചതും ചേർത്ത് നന്നായി ഇളക്കിയെടുത്തു...

ഒരു വാഴയില വാട്ടി അതിലേക്കു ഈ കൂട്ട് മാറ്റി വാഴനാര് കൊണ്ട് ചുറ്റിനും കെട്ടി കിഴി പോലെ ഉണ്ടാക്കി...
ഇനി കൃത്യം 2 മിനുട്ട് അപ്പ ചെമ്പിൽ വച്ച് ആവി കേറ്റി...

അല്ലെങ്കിൽ തീ ഏറ്റവും കുറച്ചു ഒരു തവയിൽ കുറച്ചു വെളിച്ചെണ്ണ ഒഴിച്ച് ഈ കിഴി വച്ച് പൊള്ളിച്ചെടുക്കാം... അടുപ്പിൽ ആണെങ്കിൽ കനലിന്റെ ചൂടിൽ തവയിൽ എണ്ണ തൂവി പൊള്ളിച്ചെടുക്കാം..

വാട്ടിയ വഴയിലയുടെ മണമുള്ള കൂന്തൽ ഫ്രൈ ചോറിന്റെ കൂടെയോ അപ്പത്തിന്റെ കൂടെയോ ബെസ്റ്റ് കോമ്പിനേഷൻ ആണ്... ഇനി നിങ്ങൾക്കറിയാവുന്ന എന്നേലും കോമ്പിനേഷൻ ഉണ്ടേൽ അതും പോന്നോട്ടെ..